-هاي جوازة لك خاااااااي-
هالعبارة منسمعها دائما لما نجيب سيرة الجواز, وخاصة لما نتطرق لمواصفات العروس المطلوبة, ونظرا لأنو معارفي العزابية كتار كتير, لذا سمعت آراء أشكال ألوان, وكل أنسان طبعا فيه بتصورو نموذج لزوجة المستقبل.. صح؟

بس اللي بيفاجئك وبيدهشك أنو هالمواصفات كلها محورها الجنس وفقط الجنس…

يا أخي نحنا عرب والعرب صحيح مشهورين بالكرم والسباحة والرماية وركوب الخيل, بس عدم المؤاخذة مين عاد سأل عن هالصفات.. يعني العرب كمان مشهورين بالغباء والهبل وقصر النظر, في شي مرة شفتو شي شغلة عربية ناجحة؟ .. يمكن حدا يجي يتفلسف عن شي مشروع بشي محل أو عن شي مفكر بيفكر.. للأسف بالنسبة للمشاريع المخططين كلهم أجانب والمفكرين بالضرورة مغتربين لأن الوطن العربي بيئة غير صالحة للتفكير

المهم مو هاد موضوعنا .. موضوعنا أنو العربي صفاتو السيئة أكتر من الحسنة.. وأسوأ صفة عالإطلاق الشهوة الجنسية, يالطيف ألطف.. شو هاد يا جماعة .. تقولو حصان موهيك

انتو شي مرة لاحظتو العربي شو بيفكر وطريقة تفكيرو .. هالعقدة النفسية اللي أسمها الجنس والكبت الجنسي بتخلي الأنسان ينشل فكريا, بيصير تفكيرو براس ****
بتصور قصة الكبت الجنسي بدها دراسة خاصة .. خلونا بالجوازة .. المهم أنو نحنا العرب تفكيرنا محصور بالجنس ولذلك بيجيك واحد بيقلك أنو يا أخي لما بدو يتجوز بيتجوز وحدة صغيرة موشايفة قبلو ولا رح تشوف بعدو, مع العلم أنو هيك أنسان عالغالب بيكون عامل السبعة وزمتها, أي وما يكون عمرها أكتر من ستعش أو سبعتعشر سنة وهيك بتكون شايفتو بعد الله بشوي وبربيها ع أيدو.. وهوي طبعا عمرو شي خمسة وتلاتين سنة
طيب بالله العظيم بحياة محمد وعيسى وموسى, شو بتدل هالصفات؟ بتدل ع شي غير العقدة الجنسية
بيجيك واحد تاني بيقول أنو المهم ما يزيد عمرها عن خمسة وعشرين سنة حتى لو وصل هوي للأربعين .. يعني هوي شالله يكبر بالعمر ويختير , بس هية لأ, لازم يتجوز صبية
طيب عالزمة هيك أنسان ما بيجلط؟ .. والله بنقرح لما بسمع هيك أحاديث
طيب يا أخواتي .. فكرو معي شوي… شو ممكن يصير للواحد لما بيتجوز وحدة أصغر منو بخمستعشر سنة وما فوق؟
أول مصيبة هية الغيرة.. الغيرة رح تاكل قلبو متل صحن الفول عالصبح, صحيح لاحظتو أنو العرب بيحبو الفول, والفول متل ما بتعرفو بيعمل فولاتيزم وبيسبب تسطح بالمخ وهبل مؤقت طويل الأمد
المهم من غيرتو كل ما تحركت مرتو حركة رح يسألها وين كنتي ومين شفتي وليش وكيف, بالمختصر الغيرة الزايدة جحيم
تصورو أنو المرة الغيورة مزعجة كتير, بقا كيف إذا أنقلبت الطاولة وصار الزلمة هوي اللي يغار وينق عالطالعة والنازلة وأسئلة بطعمة وبلا طعمة, يعني المشاكل ما رح تنتهي لحتى تختير المرا, هادا إذا ضلو مع بعض تتختير
غير هيك.. شو ممكن تفتح موضوع حوار مع وحدة أصغر منك بخمستعشر سنة, غير جيل, غير تفكير, يعني تقريبا متل بناتك, لما خلقت هية كنت أنت عم تحب وتعشق وتتمعشق
وبعدين رح تكون رضت فيك عن قلة مو عن محبة, أو يمكن طمع بحالتك المادية أو هرب من أهلها أو يمكن أهلها جبروها, بالمختصر محبة ما فيه, حب ما فيه , يعني اللي بيجمعكم هوي علاقة الجنس مو أكتر, وهالشي بيولد الغيرة عند الواحد, تصور حالك بتعرف أنو المتجوزها ما بتحبك.. صعبة شوي مو هيك؟
وهلق فرق السن بيولد مشكلة كبيرة كتير بالمستقبل, كيف؟
يا المرا بتكون شخصيتها قوية وبتعرف أنك بتنفذ إلي بدا ياه منشان ترضيها, وهية بتلعب عليك ملعوب أنو بتحبك وبتدير بالها ع طلباتك, وعلى الغالب طلباتك جنسية رح تكون, وهيك بتكون متل الخاتم بأصبع أجرها. بتصور هادا الوضع ما بيتمنى أي واحد عربي ينحط فيه, خاصة أنو العربي بيعتز برجولتو قال, شي بيهوي, وأكيد أي واحد رح يقرا هالمقال رح يرفض سلفا هالحل, ولذلك رح يوقع بالفخ التاني واللي هوي:
أنك انت بتكون شخصيتك قوية ورجولتك عرمرمية و بتضل معرم متل سطل الزبالة وهالشي رح يخليك لما تغار على مرتك تضربها وتقمعها لأتفه الأسباب وتهينها عالطالعة والفايتة.. لهون الأمور معك تمام.. بس يا عمو لما تختير أنت وتحتاج مين يدير بالو عليك؟ رح تقوم مرتك بهالمهمة .. بس …. ياترى لما تنتبه مرتك أنك صرت ضعيف شو بتتوقع تعمل فيك وأنت اللي طول عمرك كنت قاسي عليها.. رح تعمل فيك العجايب وتستوطي حيطك.. وأنت طبعا من تم ساكت.. لا تقلي ما بتصير .. صايرة كتير وشايف وبعرف كتير نماذج
لسا مصر تتزوج وحدة صغيرة؟ .. أكيد أي.. لأنك عربي .. والعقد اللي فيك ما بيحلها غير الله وحدو.. مافيه أمل .. العرب جرب